廣東話意譯文言經典：孟子見梁惠王(附聲音敘述)

【前言】

「義」與「利」的取捨，是儒家文化的重要課題。「孟子見梁惠王章」是《孟子》一書的開首，亦是儒家經典中的經典，重溫這篇文章，可深入了解儒家對「義」與「利」的取態。

【選文】-孟子見梁惠王

孟子見梁惠王。王曰：「叟！不遠千里而來，亦將有以利吾國乎？」

孟子對曰：「王何必曰利？亦有仁義而已矣！王曰：『何以利吾國。』大夫曰：『何以利吾家。』士庶人曰：『何以利吾身。』上下交征利而國危矣！萬乘之國，弒其君者，必千乘之家；千乘之國，弒其君者，必百乘之家。萬取千焉；千取百焉；不為不多矣；苟為後義而先利，不奪不饜。未有仁而遺其親者也；未有義而後其君者也。王亦曰仁義而已矣！何必曰利？」

據《孟子梁惠王章句上》

【廣東話意譯】

孟子見梁惠王。梁惠王劈頭就話：「喂，老人家，你長途跋涉幾千里嚟到我國，對我哋有咩着數先？」

孟子回答：「大王呀，你做咩開口埋口都講利益？呢個世界除咗利益，仲有一樣嘢叫道義呀！假設大王講：『對我國家有咩着數先。』班官又咁講：『對我家族有咩着數先。』平民又咁講：『對我有咩着數先。』上上下下都追逐利益，咁成個國家就好危險。

(容許我做以下假設)：擁有萬輛戰車嘅超級大國，能夠殺死佢嘅領導一定係有千輛戰車嘅下屬；有千輛戰車嘅中等國家，殺死佢領導嘅一定係擁有百輛戰車嘅下屬。喺有萬輛戰車嘅超級大國中擁有千輛戰車，喺千輛戰車嘅中等國家擁有百輛戰車，都咪話財富權力唔夠多。但係如果只重視利益而唔講道義，呢班人係唔會滿足(換言之佢哋會不停侵奪別人嘅利益，呢個就係只重利益嘅恐怖之處)。

從來唔會有人履行仁義而遺棄佢父母，用道義處世而輕視佢嘅君主。所以我唔同意大王嘅睇法，呢個世界最需要講嘅係道義，大王何必口口聲聲都講利益呢！」

【說明】

梁惠王- 即魏惠王，因為魏國建都於大梁，所以當時人會稱魏作「梁」。

仁義 - 儒家嘅道德原則，譯文簡化作「道義」。

萬乘、千乘、百乘：「乘」，古代嘅戰車。古代用戰車嘅多寡嚟衡量國力嘅強弱，天子擁有萬乘，較大諸侯國有千乘，其次百乘，所以譯文用現代講法將萬乘稱作超級大國。

饜：滿足。

【達理點評】

近代社會，無論人與人、國與國，總係利益先行，老套啲講句，搞到成個世界人慾橫流，甚至淪落到率獸食人，更令人髮指係有啲權貴公開承認只講利益唔講道義係合情合理嘅事。「孟子見梁惠王」雖然寫於二千多年前，今日讀嚟仍然發人深省！

編輯：達理中文

(聲音敘述)

更多「達理中文」資訊：

達理中文facebook
https://www.facebook.com/%E9%81%94%E7%90%86%E4%B8%AD%E6%96%87-109347637599428

達理中文youtube頻道
https://www.youtube.com/channel/UC9DZyN9gJexKeJoE5N25E4w